Srgssr.ch

Charta da program
Preambla
La SRG SSR metta la qualitad dals programs en il center da sias finamiras. Ella
accentuescha en spezial la credibladad e la relevanza da ses programs. Per quel intent
pretenda ella da sias collavuraturas e da ses collavuraturs in'auta professiunalitad
schurnalistica ed in profund senn da responsabladad. Ella sa definescha sco interpresa
averta e creativa en servetsch dal public. Cun ses programs contribuescha ella a la
furmaziun da l’opiniun e da l’identitad culturala da la Svizra.
La SRG SSR realisescha questa incumbensa a moda libra ed independenta. Ella fa quai
en il rom dal dretg e da l’etica. El a respecta las diversas atgnadads dal pajais.
En ina Svizra che sa mida permanentamain porscha la SRG SSR in spazi per il barat dad
infurmaziuns ed opiniuns e per ina debatta libra ed averta sin l’entir mund.
La SRG SSR surpiglia sia responsabladad envers la societad.
La SRG SSR s’engascha cun ses programs per promover la coesiun naziunala. Ella tegna
en egl la Svizra sco unitad ed en particular tut quai che contribuescha a la chapientscha
vicendaivla tranter las communitads linguisticas svizras.
La SRG SSR sa definescha sco interpresa creativa ed innovativa ed exprima quai en
l’offerta da program. La creativitad è ina premissa impurtanta e duai inspirar il svilup da las
activitads en tut ils secturs da l’interpresa.
La SRG SSR concretisescha sias intenziuns cun questa charta. Quella vala per tut ils
programs e per tuttas ulteriuras offertas publicisticas ed oblighescha tuttas collavuraturas
e collavuraturs da la SRG SSR e da sias unitads d'interpresa.
La charta da program en survista

 En servetsch dal public
 Imparzialitad, absenza da pregiudizis, pluralitad d’opiniuns  Transparenza e furmaziun d’opiniuns  Loialitad, respect da la persuna, dignitad umana, basegn da protecziun  Responsabladad ed obligaziun da dar pled e fatg La charta da program en detagl

1. En servetsch dal public
Nus ademplin nossa incumbensa, francada en la constituziun, la lescha federala e la
concessiun, en la megliera moda pussaivla, saja quai cun nossa offerta da programs sco
er cun nossa lavur quotidiana. Nus ans orientain vid ils pli auts standards professiunals ed
etics. Nus tegnain quint da las spetgas dal public.
2. Libertad e responsabladad
Nus faschain adiever das noss dretgs e da nossas libertads (libertad d’infurmaziun e
d’opiniun, libertad artistica) e defendin nossa independenza. Nus enconuschain nossas
obligaziuns legalas ed eticas e la responsabladad che sa resulta da quella envers la
societad. Nus ans stentain da segirar l’equiliber tranter noss dretgs e questa
responsabladad.
3. Integritad ed independenza
Nus essan independents dad interess da mintga spezia. Nus prendain nossas decisiuns
independentamain, senza sa laschar influenzar da pressiuns politicas, economicas u
autras. Nus resistin a pressiuns externas. Nus decidin independentamain dad interess ed
inclinaziuns persunalas; nus refusain tuttas emprovas da corrupziun.

4. Duair da dir la vardad
En nossas emissiuns d’infurmaziun ans stentain nus da vegnir uschè manaivel sco
pussaivel da la vardad. Nus ans engaschain da resguardar tut ils fatgs necessaris per
chapir ina chaussa e per derasar sulettamain infurmaziuns che provegnan da funtaunas
fidadas. Infurmaziuns sbagliadas curregin nus. Nus refusain tutta manipulaziun e
sfalsificaziun da la vardad entras maletg, tun u text. Nossas infurmaziuns procurain nus
cun meds legals ed eticamain corrects.

5. Imparzialitad, absenza da pregiudizis, pluralitad dad opiniuns
Nus essan averts per tut ils fatgs ed aspects relevants per furmar in’opiniun cumplessiva.
Nus na favurisain nagina ideologia, nagina partida u gruppa d’interess. Sche nus prendain
posiziun sa basa quel a sin in’evaluaziun cumpetenta dals fatgs. En noss programs dastga
l’actualitad quotidiana vegnir commentada sulettamain da persunas cumpetentas ed
autorisadas latiers.
6. Transparenza e furmaziun da l’opiniun
Nus essan cumplettamain transparents davart il caracter, las cundiziuns ed ils resultats da
nossa lavur. Nus declerain adina avertamain nossas intenziuns. Commentaris identifitgain
nus sco tals. La transparenza è indispensabla per furmar independentamain e neutralmain
in’opiniun. La medema transparenza applitgain nus era per preschentar las activitads ed
ils interess da l’interpresa SRG SSR.
7. Loialitad, respect da la persuna, dignitad umana, basegn da protecziun
Nossas relaziuns cun tuttas persunas èn loialas ed onestas. Nus respectain la sfera
privata, nun che motivs impurtants d’interess public cunterfan. En tuts programs
resguardain nus la dignitad umana. Fin che nagut auter è cumprovà presumain nus
l’innocenza. Nus essan attents da sez betg discriminar e betg favorisar la discriminaziun
da parts da la populaziun u gruppas d’individis. Persunas che dovran protecziun pervia da
lur vegliadetgna, lur persunalitad u pervia dad autras circumstanzas protegin nus en moda
adattada. Attenziun particulara dain nus als uffants.
8. Respect dal public
Nus mussain il mund, ils umans e lur agir cun tut ils aspects – senza cuvrir las varts
malempernaivlas, controversas, provocativas u schoccantas. Nus essan cunscients dals
effects differents che quai po avair sin noss public e tegnain commensuradamain quint da
quai.
9. Responsabladad ed obligaziun da dar pled e fatg
Nus essan cunscients da nossa responsabladad envers la publicitad. Sche nus faschain
sbagls, concedin nus quai avertamain. Nus creain in clima che pussibilitescha a mintgin
dad emprender da ses sbagls. Nus ans participain a las discussiuns davart ademplir il
mandat da service public. Las reacziuns e dumondas dal public han il dretg da vegnir
tractadas cun respect.
10. Remartgas finalas
La SRG SSR e sias unitads d’interpresa s’engaschan per respectar questa charta da
program. Las unitads d’interpresa cumpletteschan questa charta cun agens dispositivs che
reglan la lavur pratica. La charta serva sco basa per la controlla da qualitad interna. Ils
process da lavur duain gidar ad observar questa charta. La charta da program è publica.
Ella vegn messa sin ils sites da la SRG SSR e da sias unitads d’interpresa.
24 favrer 2006

Source: http://www.srgssr.ch/fileadmin/pdfs/Programmcharta_rm.pdf